“My heart is just too insistent. Isinisigaw niya, ipinipilit niya, na ipaalam ko na sa iyo na… mahal na kita.”

Agad na nagpasya si Kelly na patulan ang alok na maging caretaker ng isang abandonadong inn para sa ikagagaling ng may sakit na pamangkin at ikatatahimik nila. Pero isang masungit na lalaki ang sumalubong sa kanila at nagpakilalang may-ari ng inn, si Mateo.

“Bukas na bukas, paggising ko, gusto ko ay wala na kayo rito. Kung hindi ay ipadadampot ko kayo sa pulis.”

Nakiusap si Kelly na manatili sila. Pumayag si Mateo kapalit ng paglilinis ng inn. Dapat ay magalit si Kelly sa masamang ugali ni Mateo pero nang malaman niya ang pinagdadaanan nito ay awa ang kanyang naramdaman.

Hanggang sa unti-unti na niyang nagustuhan ang lalaki. Hindi na kasi pagtinging-kaibigan ang ipinaparamdam nito sa kanya. Pati ang kilos at mga sinasabi nito ay tumatagos na sa kaibuturan ng kanyang puso.

Pero may isang problema si Kelly. Hindi pa man kasi niya nae-enjoy ang presensiya ni Mateo ay bigla na lang sumulpot si Iya, ang babaeng umaangkin dito.