“Kasama ko ang pinakamagandang babae sa buong mundo at alam kong mahal na mahal ako. Hindi pa ba ako dapat maging masaya?” 

First love ni Jeejet si Marvin, ang best friend ng pinsan niya. Napakaguwapo kasi ni Marvin, gentleman, at napaka-thoughtful pagdating sa kanya. Pero hindi inaasahan ni Jeejet na magagawa nitong saktan siya nang malaman niyang ipinagsabi pala ni Marvin sa iba ang ginagawa niyang pagpapapansin dito. Dahil sa sama ng loob, nagawa niyang insultuhin ang pagkatao ni Marvin hanggang sa umalis ang lalaki nang hindi sila nagkakaintindihan.
Ten years later, dahil sa pagkapanalo sa sinalihang trapshooting competition sa ibang bansa, nakilala si Jeejet at kinuhang product endorser ng Sweet Booster Energy Drink. Pero sa kabila ng kasikatan, parang may kulang pa rin sa buhay niya. Dahil sa mga nakalipas na taon, natuklasan ni Jeejet na mali ang naging akusasyon niya kay Marvin. In fact, minahal din pala siya ni Marvin noon. Kaya nagi-guilty siya at laging ipinagdarasal na sana magkaroon ng chance na magkaayos na sila at magkapatawaran. 
At nangyari nga iyon nang magkita uli sila ni Marvin nang kailangang bumalik ni Jeejet sa Naga, sa lugar kung saan niya nakilala si Marvin. Pero sa muling paghaharap nila, hindi lang pala pagpapatawad ng lalaki ang gusto niyang makuha. Gusto rin ni Jeejet na mahalin uli siya nito. Kahit na mukhang imposible na iyon dahil malapit nang ikasal si Marvin sa ibang babae.